Vorweg – daß des guad werd, des hamma uns ja denkt. Daß d’Leid neugierig werdn, wos mir da so zamgschuastat ham, des hamma uns a denkt. Daß Oiss perfekt wird, des hamma gwusst, mir ham ja lang gnua hitüftelt. Daß des Maibaumleichtn aber SO a Erfolg wird, do warn sogar mir „Festl-Macher“ baff.
Freitog aufd Nacht beim Schofkopfturnier warn scho 48 Teilnehmer do, sofui hamma no nia am Start ghabt. Da Wettergott war uns – weil ma so brav warn – nach dem Sauwetter de Woch vorher a wohlgesonnen, so hot neamd frieren miassn. Manche Gsichter warn zwar eisig, aber des war wahrscheinlich wegsm schlechtn Blattl auf da Hand. De Meistn hams aber mit Humor gnumma, wenns wieder Miese gschriebm ham. Mei – Glück in da Liebe hoit dann, HUIFT JA NIX. A schena Abend wars allemoi, und gwonna hot ja dann eigentlich a Jeder. Oiso so theoretisch an Erfahrung hoit.
De ersten drei Plätze san wie folgt:
- Platz 3 mit 49 Punkten: Florian Limmer
- Platz 2 mit 50 Punkten: Rosalie Astner
- Platz 1 mit 55 Punkten: Tom Wartner (Ohne Bschiss)
Herzlichen Glückwunsch!
Samstog is dann für unsere fleißigen Helfer zeitig scho wieder weida ganga mit Werkln. Oiss fertig macha für’n Festl-Tog. In da Friah wars scho so hoaß, daß ma scho gmoant ham, s kemman togsüber eh koane Gäste, weils am See flackan.
JAAAHAAAAA, VON WEEEEEGEN!!!
Den ganzen Tog iss rund ganga bei uns, mir ham s Grinsen gar nimma ausm verschwitzten Gsicht griagt. S Bierbratl war leider scho um 12.30 ausverkafft, aber d Gäste ham Verständnis ghabt und dann hoit Grillfleisch gessn. Mir ham OIWEI Super-Gäste!!!
3 Moi hamma beim Holnburger nachkaffa miassn – bis Er dann gsagt hot, mir brauchan nimma kemma, Er hot nix mehr. HAAAAHAAAA, ausgrammt.
Nachmittog war – ned wia sonst bei hoassm Wetter – a Flaute drin, sondern s is nahtlos weiterganga. Kaffee und Kuacha, Eiskaffee (guade Idee), Pommes, Bier, Grillzeigs … koa Pause im System (wia ma so sogt).
Organisiert is wordn, wenn was aus war (danke Manu und Matthias), grennt is wordn, wenn Nachschub ausm Stüberl zum hoin war, d Kinder san bespasst wordn mit da Hüpfburg und m Spuiplatz genau danebm, da Dieter hot de Kloana a Steckerleis spendiert (vagäitsgod Dieter), und de Schnaps-Schupsn san de Gäste a wieder aufd Nerven ganga (ja mei).
Wenigstens is de oid Schnaps-Schupsn heier in Schnaps-Rente ganga. Sche wars mit Euch Mit-Trinker, aber i werd z oid für den Schmarrn. Koa Panik, i hob a sauguade Nachfolgerin. Hey, und De is a OHNE Schnaps sche! Willkommen Natascha!
Und dann aufd Nacht … BOOOAAAAAH, aufd Nacht, sog i Eich. A Traum.
Da Maibaum beleicht, wia da Nama vom Fest ja scho vorausgsagt hot. War zu erwarten, AAAABER … RUNDRUM!!! Bunt!!! D’ Bam, da Himmel, d’ Standl, d’ Zelte … Was für a Spektakel. Oiss untermoit mit fetziger Musik. Wer no do war, hot gstaunt, wer ned, der hot sauba wos versammt. Sog i Eich, i HOBS versammt (i sog ja – Schnaps-Rentnerin, ned ohne Grund).
Für de Beleuchtung und de saugeile (wia ma in Bayern so sogt) Lichtershow (sogt ma A so) RRRRESPEKT und a herzlichsttttes Vergäitsgod m Franz Jr. aus Piesenkam, der se so saustark neigarwad und alle unsere Wünsche mehr als perfekt erfüllt hot. Er is am Anfang vo Seim Gschäft und i konn Eam nur weiterempfehlen. Huat ab, Franzl.
Public Fewing (a miteinander Fernsehglotzen über a Panoramawand hoit) hamma wegsm Deutschland-WM-Spui a ghabt. Gottseidank hams gwunna. Des hot Marienstoa a no nia gsehn. Miteinander im Freien bei Musik- und Getränkebespassung Fernsehschaun. Sixtas. No a Premiere.
Ummara 5e hot dann unser Vize, da Manu, de letztn Hockerer s Liacht, n Saft und de Getränke abgsparrt, dann war a Ruah.
Bis nächstsmoi hoit. Des wird da Maibaum 2027. Nicht beleuchtet, aber neu. Selber Ort. Genauso guad. D’Lampen miassts Euch dann selber ozündn. Sozusagen. Wahrscheinlich. So werds nausgeh.
So, jetzt bedank i mi amoi speziell (seltn gnua)
DANKE an de Marienstoana Knappenkapelle, de uns den Mittagstisch (schens Wort, gei?) musikalisch untermalt ham
DANKE an Franz Jr. für de super Lichtershow und des Equipment (Zeigl, in boarisch), desd mitbrocht host
DANKE für de Helfer am Grill, Schenk, Kasse, Kuacha, Pommes, Organisatoren, Elektrikmoasta, Alle, de dabei waren und so gschuft ham
DANKE an alle unsere Gönner (Nama nenn i wia oiwei ned)
DANKE an d’Vroni, de den GEDANKEN fia a Änderung erstmoi lostreten hot
BESONDERER, AUSSERORDLICHER DANK an unsern „i bin überoi und des is guad so“ 2. Vorstand Manu. Hey, SAUGEIL. BESTER MANN!!!
DANKE an unsere wundervollen Gäste, ihr seits GEIL!!!
Merce
Gisela Willberger
Bilder vom Maibaumleichtn
